Тақдими шаҳодатномаҳо пас аз як давраи омўзишӣ
Муовини директори Китобхонаи миллӣ, номзади илмҳои педагогӣ Сайфиддин Камолзода қисмати аввали рўз ба 10 нафар кормандони Китобхонаи миллӣ, ки давраи омўзишии якмоҳаи барномаи ALEPH –ро хатм карданд, шаҳодатнома супорид.
Сайфиддин Камолзода зимни суханрониаш дар супоридани сертификатҳо кормандони Китобхонаи миллиро аз номи роҳбари Китобхона барои сазовор гаштан ба санад табрик намуд ва дар соҳаи китобдорӣ барояшон комёбиву пешрафтро орзу намуд. Муовини директори Китобхонаи миллӣ зимни суҳбат бо кормандон изҳори умеду боварӣ намуд, ки бо соҳиб шудан ба ин сертификат онҳо боз баҳри омўзиши бештари касбашон камар баста, сарчашмаҳои бештарро доир ба фаъолияти китобдорӣ меомўзанд.
-Ин шаҳодатнома шуморо водор месозад,ки аз пештар ҳам бомасъулияттар бошед ва дар рақамӣ гардондани фонди китобхона саҳми бештар гузоред, – гуфт ӯ.
Дар идома муовини директор оид ба илм, захираҳои иттилоотӣ ва хидматрасонӣ ба истифодабарандагон Сайфиддин Камолзода донандагони хуби илми китобдорӣ Сафар Шосаидзода, Шариф Комилзода, Ҷурабой Раҷабзода ва Салима Раҷабзодаро мисол овард, ки солиёни тўлонӣ дар ин самт фаъолияти пурсамар доранд ва ҳиссаи хешро дар пешрафти илми китобдории кишвар гузоштаанд. Месазад, ки аз дониши андӯхтаву таҷрибаи ғании китобдории онҳоро, ки феълан дар Китобхонаи миллӣ кор мекунанд, биомўзем.
Гулноз Халилова, Эрондухт Мастонзод ва Ҷамил Валиев кормандони Маркази таҳсилот ва иноватсияҳои китобдорӣ дар ин давраи омўзишӣ ба кормандони китобхона қисмати феҳристнигории барномаи ALEPH –ро омўзонданд.
Маркази таҳсилот ва иноватсияи китобдорӣ ният дорад аз рўзи душанбеи ҳафтаи оянда давраи омўзишии навро барои кормандони Китобхонаи миллӣ роҳандозӣ намояд. Такмили ихтисоси кормандони Китобхонаи миллӣ аз ҳадафҳои дигари марказ буда, аз рўзи таъсиси Маркази мазкур амалӣ мегардад.
Ёдовар мешавем, ки барномаи ALEPH аз 5 қисм ва 2 модел иборат аст, ки дар ҳоли ҳозир Китобхонаи миллӣ аз рўи қисмати ОПАК, маъмурият, феҳристнигорӣ ва бақайдгирӣ пурра фаъолият мебарад. Ба гуфти муовини сардори Маркази таҳсилот ва иноватсияҳои китобдорӣ Ҷамил Валиев чунин давраҳои омўзишӣ қаблан дар китобхона соле 4 мартаба баргузор мешуд, ҳоло дар доираи имконот моҳе 1 ё дар 2 моҳ як маротиба доир мегардад ва барои боло бурдани дараҷаи тахассусии китобдорон саҳми арзишманд хоҳад гузошт.
Раҳима Аъзам, бахши матбуот ва робита бо ҷомеа.