Таҷлили 80-солагии пирӯзӣ бар фашизм дар шуъбаи хизматрасонӣ ба шахсони имконияташон маҳдуд

Бо ташаббуси шуъбаи хидматрасонӣ ба шахсони имконияташон маҳдуд дар ҳамкорӣ бо шарикони рушд, аз ҷумла Rukh agancy, ширкати Сиёма ва ширкати 555 бахшида ба 80-умин солгарди ғалаба бар фашизм дар Ҷанги Бузурги Ватании солҳои 1941-1945 дар Муассисаи давлатии “Китобхонаи миллӣ”-и Дастгоҳи иҷроияи Президенти Ҷумҳурии Тоҷикистон ҳамоиши идона барпо гашт.

Дар нишаст Муҳаммадиқбол Атозода – муовини директори Муассисаи давлатии “Китобхонаи миллӣ”-и Дастгоҳи иҷроияи Президенти Ҷумҳурии Тоҷикистон, Петров Дмитрий Игоревич – котиби якуми Сафорати Федератсияи Русия дар Тоҷикистон, Шавкат Мирзоев – раиси Иттиҳоди интернатсионалистони собиқадори ҶТ, бошандагони Маркази минтақавии хидматрасонии иҷтимоӣ ба нафақахӯрон ва маъюбони шаҳри Душанбе, хонандагони доимӣ ва кормандони шуъбаи мазкур иштирок намуданд.

Ровии барномаи идона пас аз сухани табрикӣ ва як рақси зебои гулдухтарони ансабли рақсии Филармонияи кӯдакона суханро ба муовини директори Муассисаи давлатии “Китобхонаи миллӣ”-и Дастгоҳи иҷроияи Президенти Ҷумҳурии Тоҷикистон Муҳаммадиқбол Атозода дод.

Муовини директори Китобхонаи миллӣ меҳмононро хайрамақдам гуфта, ҳамагонро бо ҳафтаи ёдбуди қурбониёни ҷанг ва Рӯзи Ғалаба табрику муборакбод намуд. Номбурда аз ҷумла афзуд, ки 20 дарсад  аҳолии ҷавони Ҷумҳурии Тоҷикистон ба ҷанг сафарбар гашта, 6 дарсадашон қурбони ин ҷанг гардидаанд. Ёди онҳо дар дили мо ҳамешагӣ нақш бастааст, зеро ин мубориза баҳри инсоният, баҳри музаффарияти некӣ бар бадӣ  аст.

Сипас, Дмитрий Петров – котиби якуми Сафорати Федератсияи Русия дар Тоҷикистон суханронӣ намуд. Ӯ иштирокдоронро бо 80 солагии пирӯзӣ бар фашизм табрик намуда, чунин иброз дошт: “80 сол муқаддам, рӯзи 9-уми май халқи советӣ дар ҷанги хонумонсӯз ғалаба ба даст овард, ки ин пирӯзӣ  музаффарияти ҳамаи халқҳои Иттиҳоди Шӯравии собиқ аст. Дар ин рӯзҳо мо бо як самимияту муҳаббати хос иштирокчиёни  ҷангро ёд меоварем. Имрӯз мехоҳам, пеш аз ҳама, ба собиқадорони ҷанг ва ҷанговарони интернатсионалист миннатдории худро баён намуда, барояшон саломативу руҳи матин орзу намоям”. Номбурда ҳамчунин аз роҳбарияти Китобхонаи миллӣ ва кормандони он ҷиҳати баргузории чунин як маҳфили хотирмон изҳори сипос намуд.

Шавкат Мирзоев–раиси Иттиҳоди интернатсионалистони собиқадори ҶТ ва ҷанговари интернатсионалист, профессор Сайфиддин  Акрамзода иштирокчиёни ҳамоишро бо Иди Ғалаба табрик намуда, ба эшон саломативу хушрӯзиҳо таманно намуданд.

Дар қисми фарҳангии чорабинӣ хонандагони фаъоли шуъба – Муҳаммадҷон Холов, Мавзунҷон Ғафурзод, Зарина Абдураҳимова ва Фарҳод Қодиров, инчунин муҳассилини “Мактаби бачагонаи рассомӣ”   хотири меҳмонони арҷмандро бо рақсу таронаҳо шод карданд.

Ногуфта намонад, ки ширкати “Сиёма” барои иштирокчиёни ин чорабинӣ дастурхони идона ороста, бо таому хуришҳои лазиз зиёфат намуд.

Махфират Муҳиддинова, бахши матбуот ва робита бо ҷомеа