Ташрифи 200 нафар хонанда аз мактаби хусусии Ҳоризон ба Китобхонаи миллӣ

Субҳи рӯзи 12-уми феврал зиёда аз 200 нафар хонандагони мактаби хусусии Ҳоризони ноҳияи Синои шаҳри Душанбе бо роҳбарии омӯзгорони ин мактаб ба Китобхонаи миллӣ омаданд. Тибқи иттилои устодоне, ки онҳоро ҳамроҳӣ мекарданд, инҳо хонандагони синфҳои 5, 6 ва 7 уми муассисаи мазкур буда, дар асоси нақша чорабиниҳои роҳбарият ба китобхона ҷалб гардидаанд.

Дар оғоз мувофиқи нақшаи саёҳати меҳмонон дар Китобхонаи миллӣ хонандагон дар бораи таъсис ва фаъолияти Китобхонаи миллӣ, шуъбаву бахшҳо, ва толорҳои хониш маълумот гирифта баъдан аз гушаҳои муайянгардида дидан намуданд. Оиша Давронова ва Шарифамо Сиддиқзода – кормандони шуъбаи тарғиб ва чорабиниҳои фарҳангии Китобхонаи миллӣ хонандагонро бо Мусаввараи  “Паноҳ”- ки дар ошёнаи сеюми бино гузошта шудааст, шинос намуданд. Ҳамчунин меҳмонон бо фаъолияти шуъбаи адабиёти  кӯдакон ва наврасон, адабиёт доир ба фарҳанг ва ҳунар, шуъбаи хизматрасони ба шахсони имконияташон маҳдуд толорҳои хониш ва дигар гушаҳои Китобхона ошноӣ пайдо намуданд.

Бояд зикр намуд, ки дар мактаби мазкур забони таҳсил забони англисӣ буда, хонандагон бештар ба адабиётҳо бо забонҳои хориҷӣ таваҷҷуҳ доранд. Онҳо ҳамчунин дар идомаи сайёҳати худ бо фаъолияти шуъбаи адабиёти хориҷӣ, ки бо 63 забони дунё китобҳо нигоҳдорӣ мешаванд, шинос шуданд.

Ормон Абдусатторзода – омӯзгори ин мактаб зимни суҳбат изҳор дошт, ки, аксари хонандагон хоҳиш доранд аъзои Китобхонаи миллӣ гардида, аз хидматрасониҳои ин боргоҳ васеъ истифода намоянд. Ин омӯзгор ҳамчунин гуфт, ки мақсад аз ошноӣ пайдо намудан бо Китобхонаи миллӣ маҳз бедор намудани завқи китобхонӣ ва ҳавасмандии кӯдакон ба мутолиа мебошад.

Хонандагон баъд аз шиносоӣ бо фаъолияти шуъбаҳои Китобхонаи миллӣ азм доранд бештар ба Китобхонаи биёянд ва тавассути китоб олами дигареро барои худ кашф созанд.

Наргис Назарзода,
бахши матбуот ва
робита бо ҷомеа