Ташрифи муовини Сафири Ҷумҳурии Федеративии Олмон ҷаноби Мартин Лангер ба Китобхонаи миллӣ
5-уми ноябри соли 2024 муовини сафири Сафорати Ҷумҳурии Федеративии Олмон дар Ҷумҳурии Тоҷикистон ҷаноби Мартин Лангер ба Муассисаи давлатии “Китобхонаи миллӣ”-и Дастгоҳи иҷроияи Президенти Ҷумҳурии Тоҷикистон ташриф овард. Меҳмони воломақомро намояндаи сафорати мазкур Афзалшоҳ Ҷабборов ҳамроҳӣ намуд. Ӯро директори Китобхонаи миллӣ, доктори илмҳои педагогӣ, профессор Ҷумахон Файзализода ба ҳузур пазирифт. Дар суҳбат ҳамчунин муовини аввали директор Салима Раҷабзода ва муовини директор Зафар Саидзода ширкат карданд.
Нахуст сарвари Китобхонаи миллӣ меҳмони олиқадрро ба Китобхонаи миллӣ хушомадед гуфта, омодагии Китобхонаро барои ҳамкориҳои судманди дуҷониба бо Сафорати Олмон ва Институти Гёте изҳор дошт. Дар навбати худ муовини сафири Олмон дар Тоҷикистон ҷаноби Мартин Лангер ба директори Китобхонаи миллӣ барои пазироии гарм ва фароҳам овардани фурсати муносиби диду боздид аз Китобхонаи миллӣ ва суҳбат атрофи масоили ҳамкориҳои дуҷониба изҳори сипос намуд. Ҳамзамон ӯ бо ишора ба ин ки Китобхонаи миллӣ барои ҳамкориҳои манфиатбахши ду кишвар дар заминаҳои фарҳангӣ метавонад нақши муҳим бозад, ибрози назар намуд.
Дар идомаи мулоқоташ ҷаноби Мартин Лангер бо директори Китобхонаи миллӣ гуфт мехоҳад ҳамкории Институти Гёте дар шаҳри Тошкандро бо Китобхонаи миллӣ барқарор намояд.
Маврид ба ёдоварист, ки Институти Гёте ё Муассисаи Гёте, ки ба номи шоири маъруфи Олмон Ёҳан Волфган Гёте номгузорӣ шудааст, созмонест, ки вазифаи он густариши забон ва фарҳанги олмонӣ дар берун аз марзҳои ин кишвар аст. Аз 157 маркази ин муассиса 12 адади он дар дохили Олмон ва 145 марказ дар хориҷ аз Олмон қарор дорад. Дар доираи фаъолиятҳои педагогӣ ин ташкилоти бонуфуз инчунин барои давом додани омӯзиши забони олмонӣ маводҳои бешумореро низ барои донишомӯзон пешниҳод мекунад.
Ҷаноби Мартин Лангер хабар дод, ки барои роҳандозӣ ва тақвияти ҳамкориҳо қарор аст намояндаи Вазорати Федеролии корҳои хориҷӣ оид ба Аврупои Шарқӣ, Қафқоз ва Осиёи Марказӣ ҷаноби Конрад Ҳелмут Артс фон Штраусенбург дар давоми моҳи ноябр ба Китобхонаи миллӣ ташриф биёварад.
Бино ба гуфтаи ӯ онҳо нақша доранд бо дастгирии Институти Гёте ва Сафорати Олмон дар Тоҷикистон миёни Институт ва Китобхонаи миллӣ бо ҳузури ҷаноби Конрад Ҳелмут Артс фон Штраусенбург як Ёддошти тафоҳуми ҳамкорӣ ба имзо расонанд.
Ин Ёддошти тафоҳум, ки пешниҳоди Институи Гёте аст, дар мавриди ҳамкориҳои илмиву фарҳангӣ ва омӯзишӣ омода шудааст.
Зимни суҳбати тарафҳо зикр гардид, ки агар ёддошти тафоҳум миёни Китобхонаи миллӣ ва Институти Гёте ба имзо бирасад, соле як маротиба бо ҳам вохӯрдани тарафҳо ва ҳамкориҳои як соли гузаштаро бо ҳамдигар мубоҳиса кардан ва ҳамкориҳоро барои як соли оянда матраҳ намудан дар назар аст.
Дар ҷараёни мулоқоти расмӣ гуфта шуд, ки ҳамкории Институти Гёте бо Китобхонаи миллӣ дар бахши китобдорӣ, табодули илмии кормандон, сафарбар кардани онҳо ба хориҷ, аз ҷумла ба Олмон, омода кардани мутахассисон дар самти китобу китобдорӣ ва дар амал татбиқ намудани илмҳои омӯхтаашон аз манфиат холӣ нахоҳад буд.
Дар мавриди ҳамкориҳои илмӣ ҷаноби Лангер шарҳ дод, ки ин ҳамкориҳо барои касонест, ки дар заминаи китобдорӣ таҳқиқот бурдан мехоҳанд, метавонанд аз таҷрибаи Китобхонаи миллӣ ва китобдории Олмон истифода кунанд.
Ин кормандонро роҳбари Китобхонаи миллӣ барои сафар намудан ба хориҷ ва омӯзиши таҷрибаи кишвари Олмон, ширкат дар семинарҳо ва давраҳои омӯзишии ҳузурӣ ва онлайнӣ метавонад пешниҳод намояд.
Дар навбати худ директори Китобхонаи миллӣ ваъда дод, ки баъди омӯзиши тарҳи пешниҳодии Ёддошти тафоҳум назари худро иброз хоҳад дошт.
Суҳбат дар фазои самимиву ҳамкориҳои судманд анҷом пазируфт.
Дар охир муовини сафири Олмон дар Тоҷикистон ҷаноби Мартин Лангер гӯшаи кишварҳои ҷаҳонро дар шуъбаи адабиёти хориҷӣ тамошо намуда, бо гӯшаи кишвари Ҷумҳурии Федеративии Олмон ва китобҳо ба забони олмонӣ ошноӣ пайдо намуд.
Раҳима Аъзам, бахши матбуот ва робтита бо ҷомеа.