Идомаи танатанҳои солинавӣ дар меҳмонхонаи Сирена

Рӯзи 21-уми декабри соли 2024 меҳмонхонаи Сирена шоҳиди хушҳоливу хушбахтиии кӯдакону наврасони дорои имкониятҳои маҳдуд гардид.

Маҳфили солинавӣ, ки бо ташаббуси ширкати Rukh agency доир шуд, дар сатҳи баланд баргузор шуд ва кормандуону аъзоёни  шуъбаи хидматрасонӣ ба шахсони имконияташон маҳдуди Муассисаи давлатии “Китобхонаи миллӣ”-и Дастгоҳи иҷроияи Президенти Тоҷикистон низ дар он ширкат доштанд.

Дар барномаи идона ба шахсони дорои нуқсонҳои ҷисмонӣ зиёфати ҷашнӣ ва халтачаҳои солинавӣ ва дигар туҳфаҳои хотирмон тақдим гардид.

Дар ин ҷамъомад муовини директори китобхонаи миллӣ Ҷалолуддин Нурзода суханронӣ намуда, ба дастандаркорони маҳфил миннатдорӣ баён намуд ва барои ҳамкориҳои пайваставу дастгириҳои доимиаш ба шуъбаи хизматрасонӣ ба шахсони имконоташон маҳдуди  Китобхонаи миллӣ сипосгузорӣ намуда, умед баст, ки ин ҳамкориҳо дар оянда низ давом меёбанд. Нурзода ҳамчунин шахсони дорои имконоти маҳдудро барои Соли нав табрик намуда, ба онҳо тандурустӣ, комёбӣ, умри дарозу пурбаракат орзу намуд.

Маҳфили зебои солинавиро овозхонону ширинкорон ва аҳли ҳунар, инчунин Бобои Барфӣ бо наберааш таровату ҳусни дигар бахшиданд.

Ширинкорон аз сирки давлатӣ бо намоишу бозиҳои ҷолибу диққатҷалбкунанда табъи ҳозиринро шоду хуррам гардониданд.

Ҳамчунин қаҳрамонҳои филмҳои тасвирии машҳуру дӯстдоштаи кӯдакон ба табрики ин гурӯҳи ҷомеа ташриф оварда, бо рақсу бозиҳои зебо меҳмонони маҳфилро рӯҳбаланд намуданд.

Сарвари ширкати Rukh agency Рухшона Мирзоширинова ба сарпарастону шахсони некхоҳ арзи сипосу миннатдорӣ баён намуд.

Раҳима Аъзам, бахши матбуот ва робита бо ҷомеа.