Мушкилиҳои воридоти нусхаи ҳатмии ҳуҷҷатҳо ба китобхонаҳо
Нусхаҳои ҳатмӣ асоситарин ва муҳимтарин сарчашмаи такмили фонди китобхонаҳо ва таъмини саривақтиву беминнати истифодабарандагон бо маводи чопӣ дар китобхонаҳо мебошад. Дар баробари дигар сарчашмаҳо ва манобеи пуррагардонии фонд аз қабили харидорӣ аз шахсони алоҳида, аз ҳисоби муаллифон ва тўҳфа аз шахсони воқеиву ҳуқуқӣ, нусхаҳои ҳатмӣ сарчашмаи боъэтимод ва муҳимми мукаммалгардонии фонд ба ҳисоб меравад.
Маҳз ба ин хотир Ҳукумати Ҷумҳурии Тоҷикистон аз 26 декабри соли 2011 № 792 Қонуни Ҷумҳурии Тоҷикистон «Дар бораи нусхаи ҳатмии ҳуҷҷатҳо» – ро ба тасвиб расонида, дар ин замина 31 – уми августи соли 2012 Қарори Ҳукумати Ҷумҳурии Тоҷикистон «Дар бораи гирандагони нусхаҳои ҳатмии ройгони ҳуҷҷатҳо» таҳти № 453 ба тасвиб расонида шудааст. Қонун ва қарори дар боло зикргардида заминаҳои ҳуқуқии воридоти нусхаҳои ҳатмии ройгони ҳуҷҷатҳоро ба китобхонаҳо фароҳам оварда, номгўйи муассисаҳои дорои ҳуқуқи гирандагии нусхаи хатмии ройгони ҳуҷҷатро муайян намудааст. Инчунин, талаботи санадҳои мазкур муассисаҳои нашриявиро муваззаф месозад, ки тибқи талаботи қонуни зикргардида аз тамоми маводи чопиашон 3 нусхаи ҳатмии ройгонро ба муассисаҳои дорои ҳуқуки гирандагии нусхаи ҳатмӣ аз ҷумла Муассисаи давлатии «Китобхонаи миллӣ» – и Дастгоҳи иҷроияи Президенти Ҷумҳурии Тоҷикистон супоранд.
Бо вуҷуди он ки Китобхонаи миллӣ бойгонии ягона ва бузурги миллат буда, рисолати ҳифзу нигаҳдорӣ ва ба ин восита интиқоли китобу маводи чопӣ ба наслҳои ояндаро дораду дар баланд бардоштани сатҳи донишу маънавиёти наслҳои имрўзу фардои Ватан нақши калидӣ мебозад.
Мутаассифона, раванди супоридани нусхаҳои ҳатмии ҳуҷҷатҳо аз ҷониби муассисаҳои нашриявии кишвар хеле суст ва нигаронкунанда мебошад. Бояд гуфт, ки нашриётҳои Ҷумҳурии Тоҷикистон бояд баҳри ривоҷи фаъолияти худ ва баланд бардоштани маънавиёти ҷомеа саҳмгузор бошанд. Бо пешниҳоди нусхаҳои ҳатмӣ онҳо маводҳои худро дар байни хонандагон тағрибу ташвиқ менамоянд. Ҳангоми мутолиаи хонандагон аз китобҳои нашриётҳо баҳравард гардиданашон кӯшиш менамоянд, ки онҳо дар мағозаҳои китобфурӯшӣ дарёфт намуда, харидорӣ намоянд.
Уғул Бобораҳимова, сармутахассиси шуъбаи
илмӣ – методӣ ва таҳқиқотӣ