Унвони Шоири халқии Тоҷикистон ба Лаълҷубаи Мирзоҳасан 

Адиби маъруф Лаълҷубаи Мирзоҳасан дирӯз ба дарёфти унвони олии Шоири халқии Тоҷикистон мушарраф шуд. Шоирро барои шарафёб шуданаш ба ин унвони олӣ муборакбод мекунем.

ЛАЪЛҶУБАИ МИРЗОҲАСАН 10 ноябри соли 1951 дар деҳаи Тӯсиёни ноҳияи Роштқалъаи ВМКБ ба ҷаҳон омадааст. Соли 1973 шуъбаи филологияи тоҷики факултаи таъриху филологияи Институти давлатии педагогии Душанбе ба номи Т.Г.Шевченкоро бомуваффақият хатм ва дар мактабҳои навоҳии Ишкошиму Шуғнон омӯзгорӣ кардааст.

Соли 2011 котиби масъули бахши Бадахшони Иттифоқи нависандагони ҷумҳурӣ таъин шудааст. Ҳамзамон, номзади илми филология, дотсент ва мудири кафедраи адабиёти тоҷики Донишгоҳи давлатии Хоруғ ба номи Моёншо Назаршоев мебошад.

Ашъораш дар китобҳои «Рӯзи баҳор» (1989), «Ҷилои шишаи шабнам» (1995), «Суруди дарё» (2005), «Накҳати субҳ» (2011) интишор ёфтаанд.

Яке аз мураттибони «Тазкираи адибони Бадахшон» (2005) буда, ба 16 маҷмӯаи ашъори шоирони вилоят сарсухан навишта, муҳарририи онҳоро бар уҳда доштааст.

Барандаи Ҷоизаи адабии ба номи Мирзо Турсунзода (2015).

Аз соли 1997 узви Иттифоқи нависандагони Тоҷикистон аст.