Ҳузури то 200 нафар хонанда дар як рӯз ба толори адабиёти хориҷӣ

Мувофиқи омори дастрасгардида, ба толори шуъбаи адабиёти хориҷӣ дар Китобхонаи миллӣ ҳамарӯза то 200 нафар хонанда ташриф оварда, даҳҳо китоб аз адабиёти кишварҳои хориҷ дархост мекунанд. Аксарияти хонандагон дар шуъбаи мазкур донишҷуёни донишгоҳҳои олӣ ва онҳое ки ба мутолиаи адабиёти хориҷӣ шавқ доранд ва инчунин завқмандони омӯзиши забонҳои хориҷӣ мебошанд.

Бояд қайд кард, ки шуъбаи адабиёти хориҷӣ соли 1938 ҳамчун бахш дар сохтори Китобхона таъсис ёфта, аз соли 1956 чун шуъбаи адабиёти хориҷӣ фаъолият менамояд. Фонди шуъбаи мазкурро беш 52000  нусха китоб, 26706  маҷалла ва  2549 баста  рўзнома  бо 42 забони мухталифи ҷаҳон дарбар мегирад, ки бештари ин адабиёт доир ба фарҳанг, ҷуғрофия, забоншиносӣ, адабиётшиносӣ таърих мебошад. Як қисми фонди шуъбаро танҳо адабиёт доир ба Тоҷикистон ташкил медиҳад, ки хонанда метавонад аз таъриху фарҳанги халқи тоҷик ба забонҳои хориҷӣ мутоила намояд.

Имрӯзҳо таваҷҷуҳи насли наврасу ҷавон ба китобу китобхони бештар гардида, онҳо пайвста ба Китобхона ташриф меоранд. Толорҳои хониши Китобхонаи миллӣ ҳамарӯза пур аз хонандагон аст, ки ин аз ояндаи неки онҳо дарак медиҳад. Тибқи омори шуъбаи адабиёти хориҷӣ шумори истифодабарандагон аз хидматрасониҳои ин шуъба афзуда, ҳамарӯза то ба 200 нафар хонандагонро қабулу гусел мекунад.  Онҳо бештар донишҷӯёни Донишгоҳи давлатии тиббии Тоҷикистон, Донишгоҳи миллии Тоҷикистон, Донишгоҳи байналмилалии забонҳои хориҷии Тоҷикистон, Донишгоҳи омӯзгорӣ ва дигар донишкадаву коллеҷҳои ҷумҳурӣ мебошанд.

Бояд гуфт, ки ба шуъбаи адабиёти хориҷӣ ҳамчунин шаҳрвандони хориҷӣ ва сайёҳон ташриф оварда  аз толор ва гӯшаи намоиши китобҳои шуъба дидан мекунанд.

Маҳинбонуи Ҷамолиддин,
шуъбаи адабиёти хориҷӣ