Як бонуи хайрхоҳи дӯзанда ба 20 нафар хонандаҳои имконияташон маҳдуд пироҳани нав медӯзад
Ба шуъбаи хизматарсонӣ ба шахсони имконияташон маҳдуди Китобхонаи миллӣ ду зани покдилу дасткушод Назокат Ашўрова ва Оламбӣ Ашўрова, ки ҳамеша ба фикри ин гурӯҳи ниёзманди ҷамъият ҳастанд, ташриф оварданд. Назокат Ашўрова машшота аст ва дар толори ороиш кор мекунад.
Ба гуфти худаш 10 сол ба хайру саховат машғул аст ва аксу наворҳояшро дар шабакаи иҷтимоии фейсбук мегузорад ва барои ин кораш аз пуштибонии зиёди мардум бархӯрдор гаштааст.
Ў бори сеюм аст, ки хонандагони ин шуъбаи Китобхонаи миллиро дастгирӣ менамояд. Чанде пеш низ ў бахшида ба Рўзи ҷаҳонии маъюбон бо туҳфаҳои зебову нозанин ба табрики хонандагони маълули Китобхонаи миллӣ омада буд.
Ин бор Назокат Ашўрова ҳамроҳи дўзандаи чирадаст Оламбӣ Ашўрова ба 20 духтари нозанини дорои имконоти маҳдуд ройгон курта медўзанд.
Назокат Ашурова дар иҳотаи духтаракон, аз ҷумлаи хонандагони хуби ин шуъба меҳрубониву хушгўиҳо карда, онро аксу навор бардошта ба мардум дар шабакаи фейсбукиаш хабар медиҳад. Ў мегўяд ин корро барои худнамоӣ намекунад, ҳадафаш аз ин кор ташвиқи мардум барои дасти кўмак дароз кардан ба маълулон аст. Агар ин наворҳо намебуд, маро касе намешинохт ва бо ман ҳамкорӣ намекард. Барои мисол ҳамин дўзанда наворҳои маро дида барои некӣ кардан ташвиқ шудааст, гуфт бону Назокат.
Бонуи Назокат то ин дам ба хонандагони шуъбаи хидматрасонӣ ба шахсони имконияташон маҳдуди китобхона туҳфаҳо оварда буду дар моҳи Рамазон барои маъюбон ифтор дод.
Аз ў пурсидам чаро ин дафъа тасмим гирифтааст барои гулдухтарон куртаҳои тоҷикӣ бидўзад, гуфт, ки дар хона порча (матоъ) доштам. Як савобҷўи дигар гуфт апа порча дорам, онҳоро бигиред, ба ниёзмандон туҳфа кунед. Ин дўзанда (манзураш Оламбӣ Ашўрова) як рўз занг зад, ки апа мехоҳам кори хайр кунам, ба ятимхона ё ҷои дигар. Гуфтам ятимхона имконоти хуб дорад ва сарпарастони зўр. Сарвари муаззами кишвар Президенти муҳтарамамон Эмомалӣ Раҳмон ятимонро аз марҳаматаш дур намемонанд, онҳоро аз ҳама ҷиҳат таъмин мекунанд, аз чизе камбуд надоранд.
Хонандагони шуъбаи хизматрасонӣ ба шахсони имконоташон маҳдуди Китобхонаи миллӣ ба маҳфилҳову ҷашнҳову зиёфатҳо камтар даъват мешаванд. Биё Китобхонаи миллӣ меравем, матоъро бо танашон андоза мегирему медўзӣ.
Чевар андозаи 20 нафарро намедонад, зеро миёнашон духтарони қадбаланду қадпаст, лоғару фарбеҳ метавонад бошад. Яъне андозаи либосҳояшон фарқ мекунад ва то дўзанда онҳоро набинаду чен накунад, курта дўхта наметавонад. Гуфт апа ман бояд бираваму андозаашонро бигирам. Ба корманди шуъба занг задем, ў гуфт ҳаво гарм аст, онҳо сабр карда наметавонанд, беморанд, баъзеаш аз роҳи дур меоянд. Хоҳиш кардам, ки онҳоро гирди ҳам оварад.
Дар суҳбати кутоҳ Назокат Ашўрова ба кори хайр рў оварданашро чунин шарҳ дод:
Вақте нозукии машшотагиро аз устодам ёд мегирифтам, гуфт одамонро худат пайдо куну биёр, буридану ороиши муйи сарро дар онҳо нишон медиҳам. Бисёриҳо розӣ намешуданд, ки мани навшогирд муйҳояшонро ороиш диҳам. Вақте назди устодам мизоҷ меомад, аксараш русҳо буданд, розӣ намешуданд, ки шогирд муйҳои онҳоро ба тартиб дарорад.
Модарам гуфт духтарам ятимхонаҳо бирав, дар он ҷо мўйҳояшонро кутоҳ бикун дар назди муаллимаат. Ҳам савоб мешавад, ҳам ёд мегирӣ. Ятимхонаи 104 рафта бо устоди он машварат кардам, розӣ шуд. 3 духтараки шогирд будем, як ҳафта рафта ба ин кор машғул шудем. Ман он қадар аз ин кор хурсанд шудам, ки …
Рўзи сеюм дарвозаи он даргоҳ кушода шуд, онҳо ба сўям давида оғушам карданд, мумкин аст шуморо очаҷон бигўям, мумкин аст шуморо апаҷон бигӯям, мегуфтанд онхо.
Ба онҳо меҳр бастам. Тасмим гирифтам ин корамро идома диҳам, бо онҳо бошам, ба мушкилашон расидагӣ кунам.
Ёдовар шудан ба маврид аст, ки ҳамкории шахсони хайрхоҳу накўкор бо шуъбаи хизматарсонӣ ба шахсони имконияташон маҳдуди Китобхонаи миллӣ зиёд шудан дорад.
Раҳима Аъзам, бахши матбуот ва робита бо ҷомеа.