Як саҳифаи таърих. Баргузории нахустин мусобиқаи байналмилалии теннисбозони наврас дар шаҳри Душанбе

Бист сол пеш, аниқтараш 3-уми сентябри соли 2005 дар майдони тенниси Варзишгоҳи марказии ҷумҳуриявии шаҳри Душанбе нахустин мусобиқаи байналмилалии теннисбозони наврас барои дарёфти Ҷоми Президенти Ҷумҳурии Тоҷикистон оғоз ёфт, ки он тули як ҳафта идома кард. Ин рӯйдоде буд, ки дар таърихи варзиши Тоҷикистон, бахусус, тенниси тоҷик саҳифаи нав боз кард.

Президенти Ҷумҳурии Тоҷикистон муҳтарам Эмомалӣ Раҳмон зимни суханронии худ дар маросими  ифтитоҳи ин мусобиқа меҳмонон ва ширкаткунандагони мусобиқа – теннисбозони навраси Афғонистон, Қазоқистон, Қирғизистон, Тоҷикистон, Туркманистон, Ўзбекистон, Ҳиндустон ва Чинро бо оғози мусобиқа табрик карда, гуфтанд:

“Имрўз теннис дар ҷаҳон яке аз намудҳои маъмули варзиш ҳисоб меёбад, ки бо шавқоварии худ таваҷҷўҳи мухлисон ва дўстдорони зиёди варзишро ба худ ҷалб менамояд. Дар ояндаи наздик тенниси калон дар кишварҳои Осиёи Миёна ва Шарқӣ инкишоф ёфта, дар қатори дигар намудҳои варзиш мақоми арзандаи худро пайдо хоҳад кард. Ва дар он саҳми шумо теннисбозони ҷавон – иштирокчиёни нахустин мусобиқаи байналмилалӣ дар шаҳри Душанбе хеле арзанда хоҳад буд.

Воқеан, мусобиқаи варзишӣ воситаест, ки он ҷавононро бо кишварҳои гуногун шинос намуда, дар пайдо кардани дўстони нав ва ба таҳкими дўстии байни наслҳои ҷавони давлатҳои мухталиф мусоидат менамояд. Аз ин рў варзишро қосиди сулҳу дўстӣ мегўянд. Умедворем, ки мусобиқаи мазкур ба рушди тенниси тоҷик мусоидат намуда, дар пайдо ва кашфи варзишгарони боистеъдод кўмак мекунад..

Мусобиқаи байналмилалии теннисбозони наврас дар соли 2005, ки аз тарафи Созмони Милали Муттаҳид Соли байналмилалии варзиш эълон шудааст, дар варзиши тоҷик ҳодисаи арзишманд аст. Бовар дорем, ки дар ояндаи наздик ҳамин наврасон дар арсаи байналмилалӣ дар қатори дигар теннисбозони ҷаҳонӣ соҳибном шуда, боиси ифтихори кишварҳои худ мешаванд.

Умедворем, ки ин мусобиқа ба иди зебоию чолокӣ ва бардамии наврасон табдил ёфта, ҷолибу хотирмон хоҳад гузашт. Ба ҳамаи иштирокчиёни нахустин мусобиқаи байналмилалии теннисбозони наврас барои ноил шудан ба дастовардҳои баланд дар варзиш ва таҳсил барору комёбӣ орзу мекунам”.

Аз китоби Эмомалӣ Раҳмон: “Варзиш – қосиди дӯстӣ”, Душанбе, соли 2010.

Хоҳишмандон ин китоби хубро метавонанд дар Китобхонаи миллӣ бихонанд.

Таҳияи Дилрабо Салимова,
мутахассиси пешбари
Медиатекаи Президентӣ.