Охирин рӯзи таътили наврӯзӣ. Кормандони Китобхонаи миллӣ барои поккориҳо дар атрофи бино ҷамъ омаданд

Аз субҳ бо даъвати роҳбарияти Муассисаи давлатии “Китобхонаи миллӣ”-и Дастгоҳи иҷроияи Президенти Ҷумҳурии Тоҷикистон гурӯҳе аз кормандон ба маҳалли кор ҳозир шуданд ва даст ба корҳои низофату покӣ дар атрофи бино заданд. Ин охирин рӯзи таътили наврӯзӣ буд, ки барои кормандони Китобхона рӯзи покиву низофат эълон гардид.

Онҳо аввал бехи дарахтон ва гулбуттаҳоро нарм карданд, атрофи онҳоро аз ҳар гуна баргҳои хазону хасрӯбаҳо тоза намуданд.

Аввали баҳор аст ва ҳоло мавсимест, ки бояд ба обмонӣ ҳам омода шуд. Аз ин рӯ, лозим омад ҷӯйборҳоро ҳам аз ҳар гуна хасрӯбаҳо пок созанд, то об тавонад бе мамониат убур кунад ва ҳотаи пургулу ҳамешасабзи Китобхона обёрӣ шавад.

Бонувон дар даст ҷорӯб ва василаҳои дигар роҳравҳоро рӯбучин карданд, боз ҳам баргҳои хазон ва дигар хасу хоку регро пок карданд, то атрофи Китобхона аз ин талошҳояшон нуронитар аз қабл шавад.

Сипас, алафҳои алакай қадкашидаро дарав карданд. Ин аввалин дарави алафҳои боғ аст ва бояд даравид, то онҳо дубора бо нерӯи тоза рушд кунад.

Рӯзҳои низофату покӣ барои Китобхонаи миллӣ анъанавианд ва ҳамеша дар ҷараёнанд. Бахши кадрҳои Китобхона, ки масъули ин гуна ташаббусҳост, як рӯйхати собити ширкати ҳамагонӣ дар ин гуна тадорукотро омода кардааст ва аз ин ба баъд мисли соли гузашта дастаҳо ҳар ҳафта бонавбат ба корҳои низофат ҷалб мешаванд.