Бо бачаҳо. Чанд шеър аз китоби “Маҳтоб дар об”-и Муродалӣ Собир

568

Адиби шинохтаи кӯдакнависи Тоҷикистон Муродалӣ Собир, ки муаллифи чандин маҷмуаи шеър барои атфол аст, ба хонандаҳои худ муроҷиат мекунад ва мегӯяд: “Китоб сарчашмаи хушкнашавандаи дониш аст. Асрҳои ҳазорсолаҳо бигзаштаву одамон ҳанӯз ба ин чашма ниёз доранд. Китобро дӯст дор, одамон ҳам туро дӯст хоҳанд дошт”.

Ин чанд шеър аз китоби “Маҳтоб дар об”-и ӯст, ки соли 2022  чоп шудааст.

ЗАБОНИ МОДАРӢ          

Баёнаш сад ҳазор ояд,

Зи садҳо шева бор ояд,

Чу ҷон ҳар дам ба кор ояд,

Забони модарии мо.

 

Шунав доим нидояшро ,

Накў савту садояшро,

Асал бишмар ҳиҷояшро,

Забони модарии мо.

 

Садои дилншини мо,

Навои хуштанини мо,

Шукўҳи сарзамини мо,

Забони модарии мо.

 

Нишони ақлу биниш он,

Калиди илму дониш он

Садои савти ромиш он,

Забони модарии мо.

 

Ҳама панди ниё бошад,

Басо нуру зиё бошад.

Аҷаб лутфу сафо бошад,

Забони модарии мо.

 

МУАЛЛИМ

Аҷаб дилсўзу ғамхорӣ, муаллим,

Ба шогирдон модагорӣ, муллим.

Зи баски мекашӣ заҳмати шабу рўз,

Дами осуда  кай дорӣ, муаллим?!

Маро омўхтӣ хатту саводе,

Набинам то ягон хорӣ, муаллим.

Шавам гар лаҳзае фориғ зи ёдат ,

Маро маъзур медорӣ, муаллим !

Туро хидмат кунам ман аз дилу ҷон .

Ба ҳар хидмат сазоворӣ, муаллим.

Ба нафъи халқ ҳиммат мегуморӣ,

Ту кай чашми тамаъ дорӣ, муаллим?!

Бувад дарси ту дар ёдам ҳама умр,

Ба рўйи дида ҷо дорӣ, муаллим.

 

ТАРОНА

Насли ҷавонем,

Хушбахту озод.

Мо дар амонем

Дар мулки обод.

 

Аз Оли Сомон,

Фахру фари мост.

Аз Тоҷикистон

Тоҷи сари мост.

 

Поянда бодо

Озода давлат!

Фархунда бодо

Фарзона миллат!

 

Мехри Ватанро

Дар сина дорем.

Аз оби софаш

Оина дорем.

 

МАНЗАРАИ БАҲОРОН

Рўйи боми бобоям

Бишкуфта хуш лолаҳо.

Боди сабо гулафшон

Дар пуштаву ёлаҳо.

 

Дарахтон чатре аз гул

Гўё ба сар кашида.

Орувон рўйи гулҳо

Шаҳду асал чашида.

 

Мурғакон баҳри дона

Кушода пар ба ҳар сў.

Аз шохаи дарахтон

Нишаста дар раҳу рў.

 

Аз шуълаҳои хуршед

Рангин шуда кўҳистон.

Чирчири чирчиракҳо

Симфониёи майдон.

 

Рўйи замин – ғарқи гул,

Баҳорн шуд, баҳорон!

Ҳуши касро мебарад

Тамошои кўҳистон.

 

Аз китоби “Маҳтоб дар об”, таҳияи мутахассиси  шуъбаи           

адабиёти  кўдакон  ва наврасон Шоира СОДИҚОВА

Ин ва даҳҳо ба ин монанд китобҳои хуби назмиву насриро шумо, хонандагони азиз метавонед дар толори хониши шуъбаи адабиёти кӯдакон ва наврасон мутолиа намоед.

Аз Муродалӣ Собир дар телеграмканали мо бо китобҳои “Оҳанги Варзоб” ва “Қуллаҳо” ошно шавед.

Ин китобҳо ин ҷоянд: “ОҲАНГИ ВАРЗОБ”

“ҚУЛЛАҲО”