Баррасии китоби тозанашри Муродалӣ Собир дар маҳфили “Дар суҳбати адиб”
Маҳфили “Дар суҳбати адиб” бо иштироки шоири бачаҳо Муродалӣ Собир ва хонандагони фаъоли шуъбаи адабиёти кўдакон ва наврасони Муассисаи давлатии «Китобхонаи миллӣ» бо ҳамкории Иттифоқи нависандагони Тоҷикистон ва телевизиони кӯдакон ва наврасон “Баҳористон” баргузор шуд.
Қарор буд ин барномаи телевизионӣ дар Маҷмааи лижаронии Сафеддара наворбардорӣ шавад, аммо бинобар ҳавои номусоид он дар шуъбаи адабиёти кўдакон ва наврасони Китобхона доир гашт.
Ин маҳфил моҳе як маротиба баргузор мегардад ва хотирмону ҷолиб ҷараён мегирад. Суолҳо аз паҳлуҳои рўзгор ва осори адиб то қаҳрамонҳои асарҳои муаллифро дар бар гирифтанд.
“Сафеддара” китоби нави адиби маъруф аст, ки ҳамин сол бо сифати баланду тасвирҳои ҷолибу диданӣ чоп шудааст. Муаллиф кӯшидааст тибқи муҳтавои шеърҳо расму суратҳои ҷолибро аз мавзеъҳои тафреҳии кишвар, бахусус аз Хоҷа Оби Гарм, Сафеддара, деҳаи Камаров ва гулу сабзаи табиат, боду насими форами куҳистон дар китоб ҷо диҳад.
Китоб 1000 нусха дар Муассисаи нашриявии “Адиб” чоп шудааст.
Муродалӣ Собир 1-уми январи соли 1958 дар деҳаи Пуғузи ноҳияи Варзоб чашм ба олам кушодааст. Айёми кўдакӣ ва ҷавониашро дар зодгоҳаш гузаронида, мактаби миёнаи №78-ро соли 1975 бо муваффақият хатм намудааст. Соли 1982 факултаи филологияи тоҷики Донишгоҳи давлатии Тоҷикистон ба номи В.И.Ленинро ба итмом расонидааст. Соли 2007 факултаи иқтисодиёти ҷаҳони Донишгоҳи тиҷорати Тоҷикистонро хатм кардааст.
Аз соли 1987-ум узви Иттифоқи журналистон ва аз соли 2011 узви Иттифоқи нависандагони Тоҷикистон мебошад.
Муродалӣ Собир дар давоми фаъолияти хеш ходими адабии маҷаллаи «Машъал», мудири шўъбаи маҷаллаи ҳаҷвии «Хорпуштак», сармуҳаррири ҳафтаномаи ноҳиявии «Навиди Варзоб», сардори дастгоҳи ҳукумати ноҳия, ходими Кумитаи гумруки назди Ҳукумати Ҷумҳурӣ будааст. Аз соли 2003 то инҷониб директори минтақаи истироҳатии «Пуғуз» мебошад .
То имрўз маҷмўаи шеъру ҳикояҳояш бо номҳои:
«Садои сукут» – соли 2006
«Субҳи Варзоб» – соли 2007
«Оҳанги Варзоб» – соли 2009
«Гули бодом» – соли 2010
«Қуллаҳо» – соли 2011
«Шоҳпарак» – соли 2013
«Тифли дарё» – соли 2013
«Сиришки ханда» – соли 2014
«Навои резаборон» – соли 2014
«Зангулалолаҳо» – соли 2021
«Қиссаи фил ва муш» – соли 2022
«Матоб дар об» – соли 2022
«Қиссаи гови момои Шарифамоҳ» – соли 2023 ва маҷмуаи шеърҳои бачагонааш бо номи «Сафеддара» соли 2024 аз чоп баромадаанд.
Муродалӣ Собир барандаи Ҷоизаи адабии ба номи Мирзо Турсунзода, Аълочии Фарҳанги Тоҷикистон ва Аълочии маориф ва илми Ҷумҳурии Тоҷикистон мебошад.
Раҳима АЪЗАМ, бахши матбуот ва робита бо ҷомеа.