Маҷаллаи “Барои адабиёти сотсиалистӣ” дар бойгонии Китобхонаи миллӣ

Маҷаллаи “Барои адабиёти сотсиалистӣ” бо қарори КМ ВКП аз 23 апрели соли 1932 “Дар бораи азнавсозии ташкилотҳои адабӣ-бадеӣ” ба роҳ монда шуда буд. Пеш аз ин солҳои 1927-1932 маҷалла бо номи “Роҳбари дониш” нашр мешуд. Аз соли 1937 он “Шарқи Сурх” номида шуд. Аз моҳи майи соли 1964 номи “Садои Шарқ”-ро гирифт, ки имрӯз ҳам моҳнома бо ҳамин ном пайваста мунташир мешавад.

Дар шумораи якуми “Барои адабиёти сотсиалистӣ” манзумаи Пайрав Сулаймонӣ “Ба мулитаристони Япония”, мақолаи Ғанӣ Абдулло “Барои танқиди болшевикона” ва шеъру мақолаҳои дигар адибони тоҷик ба табъ расиданд.

Соли 1934 ба муносибати ҳазораи ҳаким Фирдавсӣ дар маҷаллаи мазкур мақолаҳои пурмуҳтавои Садриддин Айнӣ “Фирдавсӣ ва Шоҳномаи ӯ”, Бектош “Абулқосими Фирдавсӣ”, Фитрат “Фирдавсӣ” чоп шудаанд.

Ба ҳайати таҳририяи маҷалла дар ин солҳо Абулқосим Лоҳутӣ (сармуҳаррир), Садриддин Айнӣ, Сотим Улуғзода, Б. Азизӣ, Р. Абдулло ва дигарон шомил буданд.

Чуноне ишора рафт, маҷалла бо номи “Барои барои адабиёти сотсиалистӣ аз соли 1932 то 1937  чоп шуд. Тӯли ин шаш сол беҳтарин мақолаҳо аз вазъи адабиёт, таърихи адабиёти тоҷик, осори адибони муосирро чоп кард.

Ин маҷалла минбари боэътимоди адибони Точикистон барои пешрафти адабиёти шуравии тоҷик буд.

Дар айни замон дар бойгонии шуъбаи матбуоти даврии Муассисаи давлатии “Китобхонаи миллӣ”-и Дастгоҳи иҷроияи Президенти Тоҷикистон аз соли 1932, 2 шумора (№3-4), соли 1933, 6 шумора (№3, 5-6, 7-9), соли 1934 12 шумора (№1-12), соли 1935 12 шумора (№1-12), соли 1936 12 шумора (№1-12), соли 1937 4 шумора (№1-4) маҷаллаи “Барои адабиёти сотсиалистӣ” маҳфуз аст.

Кормандони шуъба барои дар ҳоли хуб нигоҳ доштани ин маҷаллаи таърихӣ талош мекунанд.

Хоҳишмандон метавонанд аз ин маҷала бо вазъи адабиёти тоҷик дар аввали солҳои 1930 ошно шавад.

Шавқинисо Носирова, мутахассиси шуъбаи матбуоти даврӣ