Озмуни ҷумҳуриявии “Донандаи беҳтарини асарҳои Пешвои миллат” (ВИДЕО)

Озмун соли дувум аст баргузор мегардад ва ҳадафи асосии он шиносонидани насли ҷавону наврас ба таъриху тамаддун ва фарҳангу забони миллати тоҷик аст.

Боварӣ дорем, ки бо роҳандозии ин озмун мо ба роҳи дурусту рӯшан ҷавононро роҳнамоӣ мекунем ва насли нави мо бо хондани асарҳои Пешвои муаззами миллат дар тафаккур ва маърифати худ такони ҷиддиеро пайхас хоҳанд кард.

Ин Озмун бо мақсади арҷгузорӣ ба таърихи пурифтихори миллати тоҷик, омўзиши амиқу ҳамаҷонибаи корнамоиҳои наҷиб ва фаъолияти шоистаи Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар роҳи наҷоти давлат, таҳкими Ваҳдати миллӣ, эъмори модели нави давлати демократӣ, ҳуқуқбунёд, дунявӣ ва ягонаи Тоҷикистон дар шароити нави таърихӣ ва ба ин васила дарёфти чеҳраҳои нави суханвару сухандон, арҷ гузоштан ба арзишҳои миллию фарҳангӣ, инкишофи қобилияти эҷодӣ, таҳкими эҳсоси худогоҳию худшиносӣ, ифтихори миллӣ, тақвияти қобилияти кордониву роҳбарӣ, омўзиши ҳамаҷонибаи Мактаби давлатдории Эмомалӣ Раҳмон миёни қишри ҷавони аҳолии кишвар, бахусус донишҷўёни муассисаҳои таҳсилоти миёна ва олии касбӣ доир мегардад.

Сарпарасти Озмун, Муассисаи давлатии «Китобхонаи миллӣ»-и Дастгоҳи иҷроияи Президенти Ҷумҳурии Тоҷикистон (минбаъд – Китобхонаи миллӣ) буда, он миёни донишҷўёни муассисаҳои таҳсилоти миёна ва олии касбӣ (бакалавр, магистр) дар ду давр доир карда мешавад. Даври аввал аз моҳи май дар муаасисаҳои миёна ва олии касбӣ оғоз шуда буд.

Даври ниҳоӣ рӯзҳои 23-27 сентябр дар Китобхонаи миллӣ баргузор мегардад.

Телефонҳо барои маълумоти бештар: 221-89-76, 221-32-91, 221-01-75.

Мавзуна Орумбекова, сардори шуъбаи маркетинг ва менеҷмент