Ширкати кормандони  мо дар барномаи радиои “Овози тоҷик”

Ду корманди Медиатекаи Президенти Ҷумҳурии Тоҷикистон Китобхонаи миллӣ дар як барномаи радиои “Овози тоҷик” ширкат карданд. Мавзуи сӯҳбат вазъи омодагии муассисаҳои таҳсилоти миёна ва олии касбӣ ба Озмуни ҷумҳуриявии “Донандаи беҳтарини асарҳои Пешвои миллат” буд.

Дар ин барнома, ки мустақиман садо дод, кормандони Медиатекаи Президент дар бораи шароитҳои фароҳамшуда дар Китобхонаи миллӣ барои баргузории озмуни ҷумҳуриявии “Донандаи беҳтарини асарҳои Пешвои миллат”, шартҳо ва ҳадафҳои озмун, давраҳои баргузории он ва ғайра ба суолҳо посух доданд.

Гуфтанд, ки даври аввали Озмун моҳи майи соли ҷорӣ дар муассисаҳои таҳсолти миёна ва олии касбии ҷумҳурӣ гузаронида шуд ва қарор аст даври ниҳоии он моҳи сентябр дар Китобхонаи миллӣ баргузор гардад.

Ҳамзамон, кормандони Медиатекаи Президенти Ҷумҳурии Тоҷикистон ба шунавандагон тавсия доданд, кулли осори Пешвои миллат муҳтарам  Эмомалӣ Раҳмонро метавонанд дар толори махсусе, ки роҳбарияти Китобхона барои ин озмун ҷудо кардаанд, мутолиа кунанд ва худро ба озмун омода созанд.

Онҳо ҳамчунин гуфтанд, ки дар ин толор на танҳо китобҳо, балки шароити хондан муҳайёст. Инчунин тавсия дода шуд, ки касоне, ки дур аз пойтахтанд ва имкони омадан ба Китобхонаи миллӣ надоранд, метавонанд асарҳои Президенти Ҷумҳурии Тоҷикистонро онлайн аз веб-сайти Китобҳои электронӣ дастрас кунанд.

Медиатекаи Президенти Ҷумҳурии Тоҷикистон