Ширкати намояндагони Тоҷикистон дар Форуми адабиёти кӯдакон ва наврасон дар шаҳри Москав
Намояндагони Ҷумҳурии Тоҷикисон дар форуми байналмилалии Китоби кӯдакон ва наврасони кишварҳои узви ИДМ, ки ахиран дар шаҳри Москав баргузор шуд, шикат намуданд. Форум ба масъалаи муҳими табу нашри китоб барои атфол бахшида шуда ва дар он аз ҳама мамолики узви Иттиҳоди Давлатҳои Мустақил ва Гурҷистон иштирок доштанд.
Ҷумҳурии Тоҷикистонро дар ин форум муовини аввали Директори Китобхонаи миллӣ Салима Раҷабзода, сардори шуъбаи адабиёти кӯдакон ва наврасони китобхона Шаҳноза Дониёрова, адиби маъруфи кӯдакнависи Тоҷикистон Азизи Азиз ва дигарон намояндагӣ карданд.
Дар форум бештар масъалаҳо вобаста ба табу нашр ва таблиғи осори адибон барои бачаҳо, китобу китобдорӣ, таблиғ, густариши ҳамкориҳо дар ин заминаҳо мавриди баҳсу баррасиҳо қарор гирифт.
Дар ҳошияи форум намоиши китоби кӯдакону наврасон доир шуд. Ҳамагон имкон доштанд бо китобҳои барои кӯдакон нашршуда дар Русия аз назик ошно шаванд.
Форум як майдони бози муколамаро мемонд, ки дар он ноширон бо адибон, китобдорон, рассомон, наққошон, паҳнкунандагони адабиёт барои кӯдакон миёни худ муколама доштанд, аз вазъи адабиёти кӯдак дар кишварҳои худ огоҳӣ ёфтанд ва барои ҳамкориҳо дар заминаи тарҷума ва чопи асарҳои ҳамдигар бо забонҳои расмии кишварҳои узв тарҳҳои нави ҳамкорӣ кашиданд.
Дар форум муовини аввали Директори Китобхонаи миллӣ Салима Раҷабзода дар бораи нашри китоби кӯдак дар Тоҷикистон ва ҳамкориҳои Китобхонаи миллӣ барои таблиғи адабиёти кӯдак дар кишвар, маҳфилу чорабиниҳо ва дигар василаҳои таблиғи адабиёти бачаҳо суханронӣ кард.
Шаҳноза Дониёрова дар бораи фаъолиятҳои шуъбаи адабиёт барои кӯдакону наврасон, сатҳи дарку хониши хонандагон, маҳофиле, ки адибон бо хонандаҳои худ муколама мекунад ва фаъолияти наврасони эҷодкор нақл кард.
Адиби маъруф Азизи Азиз дар бораи вазъи чопи китоб барои бачаҳо дар Тоҷикистон ибрози назар намуд ва чандин роҳи ҳамкории адибони кӯдакнависи кишварҳоои узви ИДМ барои равнақи китобҳо барои кӯдакон иброз дошт. Азизи Азиз ҳамчунин гуфт, ки чопи китоб барои кӯдакон дар ҳамаи кишварҳои мушкилоти худро дорад ва танҳо ҳамкориҳо миёни ноширон ва адибон, адибон бо адибон, рассомону наққошон ва ғайра метавонад саҳифаи наву дар ин самт боз кунад.
Б.Шафеъ