Ғолибони озмуни “Мо метавонем” дар Китобхонаи миллӣ қадрдонӣ шуданд
1 – уми майи соли равон маросими ҷоизасупориии озмуни “Мо метавонем”, ки бо ташабусси шуъбаи хизматрасонӣ ба шахсони дорои имкониятҳои маҳдуд роҳандозӣ шуда буд, баргузор гардид.
Ба чорабинӣ хонандагони фаъоли шуъбаи хизматрасонӣ ба шахсони имконияташон маҳдуди Китобхонаи миллӣ, ҳамчунин хонандагон аз Колеҷи маъюбон ва мактаби нобиноёни шаҳри Ҳисор даъват шуда буданд.
Дар қисмати аввал меҳмононро бо зиёфат сари дастархони пурнозунеъмате пазироӣ намуданд.
Ба ғолибони озмуни “Мо метавонем”, ки қаблан аз рӯи 4 наминатсия сарояндагӣ, навозандагӣ, қироати шеър ва ҳунармандон бо ҷойҳои якум, дуюм, сеюм ва ҷойҳои ифтихорӣ муайян гардида буданд, дар маросими тантанавӣ туҳфаҳои хотирмон супорида шуд.
Қисмати ҷамъбастии чорабиниро барномаи фарҳангии бошукуҳе бо ширкати ҳунармандони касбӣ аз ансамбли “Шашмақом”-и Кумитаи телевизион ва радиои назди Ҳукумати Ҷумҳурии Тоҷикистон, ҳунармандон аз ансамбли “Наврӯз”-и Донишгоҳи миллии Тоҷикистон ҳамчунин хонандагони фаъоли шуъбаи хизматрасонӣ ба шахсони дорои имконоти маҳдуд ташкил дод.
Наргис НАЗАРЗОДА