Ҳунарманди варзида ва инсони дилогоҳ

Сухан аз китобномаест, ки соли 2018 бо талоши Китобхонаи давлатии бачагонаи ҷумҳуриявии ба номи М.Миршакар бо номи “Бобоев  Толибҷон Ғаниевич” таҳия ва чоп шудааст. Мураттиб ва муаллифи пешгуфтор Қурбон Ғуломзода мебошад. Мавсуф дар пешгуфтораш ба китоб аз ҷумла навиштааст: Дар маҷмўаи мазкур мақолаву меҳрномаҳои олимону адибон ва мутахассисони соҳаи санъату фарҳанг доир ба зиндагинома ва фаъолияти илмиву эҷодии «Артисти хизматнишондодаи РСС Тоҷикистон», дотсенти кафедраи маҳорати актёрии ДДФСТ ба номи Мирзо Турсунзода, директори Муассисаи давлатии «Театри давлатии ҷавонони Тоҷикистон ба номи Маҳмудҷон Воҳидов», аълочии фарҳанги Ҷумҳурии Тоҷикистон Толибҷон Бобоев, осорнома ва адабиёт доир ба фаъолияти илмиву эҷодии ў фароҳам омадааст.

Вазири пешини фарҳанги Ҷумҳурии Тоҷикистон Шамсиддин Орумбепкзода гуфтааст, ки “дар бораи ҳунарпешаҳои саҳна ва синамо мақола, рисола ё тақризе нанавиштаам. Чун ба яқин медонам, ки воқеан ҳам ба эҷоди ин ё он ҳунарпеша наметавон баҳои ҳаққонӣ дод. Ҳунарманд ҳатто дар офариниши  як нақш низ чандин рӯзу моҳҳо кор карда, басе андеша рондаву  ба хулосаи ниҳоӣ омадааст. Биноан ҳамин гуна баҳодиҳӣ ба ҳунар аз дидгоҳи  муҳаққиқ берун нест.

Аммо дар хусуси Толибҷон Бобоев банда бо камоли майл ва эҳтиром ибрози андешаамро  дареғ намедорам. Чунки бо ин марди ҳунар ҳамкории зич дорем, қариб ҳар рӯз бо ҳам вомехӯрем…”

Маҷмуа аз ду қисм  ва кумакфеҳристҳо иборат аст. Дар қисми аввал мақолаҳои марбут ба ҳаёт ва фаъолияти ҳунарманд, ки аз ҷониби чеҳраҳои шинохта навишта шудаанд, гирдоварӣ шудаанд.

Қисми дуюм номгӯи асарҳои илмӣ, методӣ, таълимӣ, маводи таҳриркардаю тартибдода, тақризу мусоҳибаҳои Толибҷон Бобоев ва адабиёти марбут ба ҳаёту фаъолияти ӯро дар бар мегирад.

Китобномаи  “Бобоев Толибҷон Ғаниевич”-ро шумо, хонандагони азиз, метавонед дар шуъбаи адабиёт доир ба фарҳанг ва ҳунари Китобхонаи миллӣ мутолиа намоед.

Бунафша Абдураҳимова, мутахассиси шуъбаи адабиёт доир ба фарҳанг ва ҳунар.