Мизи гирд бахшида ба рӯзи матбуот дар Китобхонаи миллӣ
Нимаи аввали имрўз дар Китобхонаи миллӣ мизи гирд бахшида ба Рўзи матбуоти тоҷик таҳти унвони «Матбуоти миллӣ-тарғибгари арзишҳои истиқлолияти давлатӣ» доир гардид.
Нишастро директори Китобхонаи миллӣ профессорҶумахон Файзализода оғоз ва ҳозиринро ба муносибати Рўзи матбуоти тоҷик табрик намуд.
Директори Китобхонаи миллӣ изҳори умед намуд, ки ин ҳамоиш бо маърузаву суханҳои созандааш барои рушди соҳаи матбуоти кишвар ва таҳкими илмҳои филология, забоншиносӣ ва таърихнигории тоҷик мусоидат хоҳад намуд. Вай ҳамчунин гуфт, ки матбуот дар воқеъ яке аз рукнҳои муҳими сиёсӣ, фарҳангӣ, иқтисодӣ, иҷтимоӣ ва маънавии ҷомеа мебошад, ки агар бо риояи усулҳои неки рўзноманигорӣ нашр шавад, дар таҳкими асолатии миллӣ, пояҳои давлатдорӣ, худшиносии ҷомеа ва ҷаҳонбинии мардум нақши амиқ мебозад.
Профессор Файзализода дар ҷойи дигар аз суханронии худ дар бораи аввалин рӯзномаи тоҷикӣ – “Бухорои Шариф” ёдовар шуд ва иброз дошт: “бо шарофати истиқлоли сиёсии давлатамон ва зери ҳидоятҳои Асосгузори сулҳу Ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон “Бухорои Шариф” ҳамчун нахустрӯзномиа тоҷикӣ эътирофи расмӣ пайдо намуда, рӯзи нашри аввалин шумораи он, яъне 11 март аз соли 1994 ҳамчун Рӯзи матбуоти тоҷик ҷашн гирифта мешавад.
Директори Китобхонаи миллӣ ҳамчунин хабар дод, ки ҳоло бо талоши кормандони китобхона шумораҳои дастрасшудаи “Бухорои Шариф” бо хати крилӣ баргардон шудааст.
Сипас, декани факултаи журналистикаи Донишгоҳи миллии Тоҷикистон, дотсент Бахтиёр Қутбиддин дар мавзӯи нақши матбуоти маҳаллӣ дар фазои иттилоотӣ суҳбат намуда, гуфт, ки Китобхона махзани бузургест, ки мо бидуни он наметавонем нақшаҳову таҳқиқҳоямонро ба анҷом расонем. Матбуоти маҳаллӣ дар радифи матбуоти миллӣ, матбуоти соҳавӣ, матбуоти тиҷоратӣ, матбуоти иттиҳодиявӣ, хусусӣ ва амсоли ин имрўз дар қолаби хоси худ ба равзанаи афкори хонанда роҳ ёфтан мехоҳад.
Бахтиёр Қутбиддин дар идомаи суҳбаташ дар ин нишаст афзуд, матбуоти маҳаллӣ дар самти таъсир бахшидан ба доираи афкори омма мавқеи назаррас дорад. Ин нақш ҳанӯз аз солҳои 30-юми асри гузашта маълуму мушаххас буд. Дар назди газетаи ноҳиявии солҳои 30-юму 40-ум вазифаи аввалиндараҷа он буд, ки матолиби онҳо бояд таъсирбахш бошад, аз онҳо танқид ва худтанқидкунӣ талаб карда мешуд.
Мудири кафедраи телевизион ва радиошунавонии факултаи журналистикаи Донишгоҳи миллӣ Сангин Гулов низ дар мизи мудаввар ширкату суханронӣ намуд. Аз ҷумла, ў изҳор дошт, ки ҳама гуна дастовардҳои замони Истиқлол ба таври бояд инъикос ва таҳлилу ташреҳ мешавад. Ин гувоҳи он аст, ки Истиқлол пушту паноҳи матбуот аст ва матбуот пушту паноҳи давлатдории миллӣ.
Ба андешаи Хуршеди Атовулло, бунёдгузори силсиланашрияҳои «Фараж» матбуоти миллӣ бояд ба чанд талабот посух гуфта тавонад. Давлат ва ҳукумат бояд онро ба сифати як институти фаъол ва таъсиргузори ҷомеа шиносанд. Дар ҳоле, ки матбуоти мо бо шумораи ками аҳолӣ дар тамос ҳастанд, ин чиз барои ҳукумати иҷроия қобили ташвиш нест ва нақши онҳо дар идоранамоии ҷомеаи хеле камранг мебошад. Масъалаи миллӣ ва давлатсозӣ дар онҳо бояд мавриди баҳс ва таҳлилҳои амиқи коршиносони соҳа ва рўзноманигорон қарор гиранд.
Дар мизи гирд ҳамчунин устоди факултаи журналистикаи Донишгоҳи миллӣ Қироншоҳ Шарифзода, ки яке аз пажӯҳишгарони муваффақи аввалнашрияҳои тоҷикӣ ба шумор меравад, суханронӣ намуд.
Дар нишаст як зумра рўзноманигорон, аз ҷумла Директори хабаргузории “Ховар” Субҳиддин Шамсиддинзода, Маъруфҷон Оқилов, Ҳамза Махмудӣ, Мирзоамин Мирсайидзода, Самандар Искандарзода ва Носир Саидов бо ифтихорномаи Китобхонаи миллӣ сарфарорз гардонда шуданд.
Ёдовар мешавем, ки рӯзноманигорони тоҷик ҳамасола 11-уми март иди касбияшонро таҷлил менамоянд. 11-уми март рӯзест, ки аввалин рўзномаи тоҷикӣ бо номи «Бухорои Шариф» бори нахуст нашр шуд.
Дар замони Шӯравӣ 5-уми май, ки шумораи нахустини нашрияи ҳизби коммунист “Правда” чоп шуда буд, чун Рӯзи матбуот дар саросари кишвар, аз ҷумла дар Тоҷикистон таҷлил мешуд.
Раҳима БОБОЕВА,
бахши матбуот ва
робита бо ҷомеа.