Мухтасар дар бораи як луғати ҷопонӣ ба русӣ, ки дар Китобхонаи миллӣ метавон аз он баҳра бурд

Луғати мазкур барои хондан ва тарҷумаи маводҳои муосири васоити ахбори оммаи ҷопонӣ ва матбуот, ки дар худ ҷанбаҳои сиёсӣ ва иқтисодиро доро ҳастанд, пешбинӣ гардидааст. Чуноне аз сарсухан бармеояд аз сабаби калонҳаҷм набудани луғатнома тартибдиҳандагон онро барои истифода дар тарҷумаи бадеӣ тавсия надодаанд.

Ин луғатнома соли 1951 аз ҷониби Л.А. Назмер ва Н.А Сырмоятников ба теъдоди 5 ҳазор адад нашр гардида буд, ки 34 ҳазор калимаву ибораҳоро аз ҷопонӣ ба русӣ шарҳ додааст.

Луғати ҷопонӣ-русӣ дар ҳаҷми 828 саҳифа соли 1951 аз ҷониби нашриёти  “Гасударственное издательство Национальных словарей” дар Москав чоп шудааст.

Китоби мазкур яке аз нодиртарин луғатномаҳои ҷопонӣ ба   русӣ  ба шумор меравад. Дар баробари ин қадимтарин луғатномаи  ҷопонӣ ба русие мебошад, ки дар Китобхонаи миллӣ нигаҳдорӣ мешавад.

Солҳои тӯлониест, ки ин китоб мавриди истифода қарор дорад ва имрӯз низ онро хонандагон дархост менамоянд. Ин ба он маъност, ки то ҳанӯз ин луғатнома мақому манзалаташро миёни истифодабарандагон гум накардааст.

Манижабону Ибрагимова
Мутахассиси пешбари шуъбаи
тарғиб ва барномаҳои фарҳангӣ.